As irmás Mirabal

Endl Ies Enrique Muruais

25 novembro 2016

As irmás Mirabal

Patria Mercedes Mirabal (27 de febreiro 1924-25 de novembro 1960), Minerva Argentina Mirabal (12 de marzo 1926-25 de novembro 1960) e Antonia María Teresa Mirabal ( 15 de outubro 1936-25 de novembro 1960) foron dominicanas que se opuxeron feramente á ditadura de Rafael Leónidas Trujillo.

Unha cuarta irmá, Bélgica Adela “Dedé” Mirabal ( falecida en febreiro de 2014) non tivo un papel activo nas actividades feitas contra o ditador , o que lle permitiu sobrevivir.

De familia rural acomodada, as irmás Mirabal estudaron nos mellores colexios e, cando Trujillo chegou ao poder, a súa familia perdeu case toda a súa fortuna. As Mirabal crían que Trujillo levaría o país ao caos económico e formaron un grupo de oposición ao réxime, chamado o Movemento do 14 de xuño.

Dentro deste grupo eran coñecidas como As Bolboretas pola súa persistente actividade rebelde.

Foron encarceradas e torturadas en varias ocasións. A pesar desta situación, continuaron a súa loita por terminar coa Ditadura.

Logo de varios encarceramentos, Trujillo decidiu terminar coas irmás. O 25 de novembro de 1960 enviou homes para interceptar a camioneta na que viaxaban as tres mulleres logo de que visitaran os seus homes en prisión. As irmás, totalmente desarmadas, foron levadas a unhas plantacións de cana, e logo acoiteladas e estranguladas

Trujillo creu no momento que eliminara un gran problema. Porén, o asasinato tróuxolle moitos inconvenientes. A morte das Mirabal causou gran repercusión na República Dominicana e o pobo dominicano amosouse cada vez máis proclive a apoiar ás irmás Mirabal e aos seus ideais. Esta reacción contribuíu a espertar a conciencia do público e eventualmente culminou co asasinato de Trujillo en maio do 1961.

As Mirabal están soterradas en Ojo de Agua, nos arrabaldes da cidade de Salcedo, na provincia do mesmo nome da República Dominicana. O lugar converteuse nun museo na súa honra e está aberto ao público. Ademais hai alí unha biblioteca, librería e tenda de agasallos. Soterrado no mesmo lugar tamén están os restos de Manolo Tavares Justo, quen fora esposo de Minerva.

O 17 de decembro de 1999, a Asemblea Xeral das Nacións Unidas, declarou o 25 de novembro como Día Internacional para a eliminación da Violencia contra a Muller, en conmemoración do sacrificio das irmás.

En 1995, a escritora dominico-americana Julia Álvarez publicou a novela No tempo das Bolboretas, unha novela baseada na vida das Mirabal . A novela foi levada ao cine co mesmo nome e protagonizouna Salma Hayek, como Minerva e Edward James , como Trujillo

25 novembro 2016